चीनचे मानसिक दबावतंत्र आणि ...

दैनिक प्रत्यक्षच्या ३१ जुलैच्या अंकातील "चिनी लष्करांना आक्रमकांना  पराभूत करण्याची क्षमता" ह्या शीर्षकाखालील राष्ट्राध्यक्ष शी जिनपिंग यांचा दावा आणि १ऑगस्टच्या अंकातील ’डोकलाम’ नंतर चीनची भारताच्या हद्दीत नवी घुसखोरी हे लेख वाचून पूर्वापार चालत आलेल्या "मानसिक दबाव तंत्र "युध्दाचा चीन अवलंब करून भारतावर अरेरावी करीत आहे असेच वाटते.

दैनिक प्रत्यक्षचे कार्यकारी संपादक डॉ अनिरूध्द जोशी ह्यांनी दिनांक १०-०८-२००६ रोजी दैनिक प्रत्यक्ष मध्ये लिहिलेल्या व नंतर "तिसरे महायुध्द" ह्या पुस्तक स्वरूपात प्रकाशित झालेल्या "आधुनिक शस्त्रास्त्रे आणि प्रभाव -१० मानसिक दबाव युध्दतंत्र " ह्या अग्रलेखाची आठवण झाली. त्यात डॉ अनिरूध्द जोशी ह्यांनी नमूद केल्या प्रमाणे मानसिक दबाव युध्दतंत्र ह्या अत्यंत प्रगल्भ झालेल्या युध्दशास्त्राच्या अंगाचा चीन पुरेपूर वापर करीत असलेला स्पष्टपणे आढळत आहे.

मानसिक दबाव युध्दतंत्राचा प्रभावी वापर तेराव्या शतकात क्रूर , आक्रमक चंगीजखानने जगाचा खूप मोठा भूभाग जिंकताना केला होता. ज्या प्रदेशावर हल्ला करावयाचा त्या प्रदेशातील लोकांचे मानसिक धैर्य खच्ची करून मगच आक्रमण करायचेह हा मार्ग त्याने अवलंबिला होता. चंगीजखानचा आपल्या प्रचंड सैन्यताकदीच्या व क्रौर्याच्या कथा प्रत्यक्ष युध्द पीडितांच्या तोंडातून ऐकून हल्ला करावयाच्या राज्यातील नागरिकांचे व शासकांचे मनोधैर्य ढासळून टाकावयाचे असा त्यामागील मूळ हेतु असायचा. 

                                                                 

अशाच रणकुशलयुध्दनीतिचा वापर करून चर्चिलने जग जिंकण्याची महत्त्वाकांक्षा असलेल्या हिटलरच्या मनात सदैव अमेरिका व रशियाच्या प्रभावाविषयी व सहभागाविषयी भयगंड निर्माण केला होता आणि रशियावरील आक्रमणात हिटलरला चूक करण्यास भाग पाडून सैबेरिया प्रांतात मनुषयबळा ऐवजी नैसर्गिक बळाच्या आधाराने ६ लाख जर्मन सैनिकांचा पराभव करून बळी घेतला होता. अमेरिकेने ह्याच तंत्राने इराकवर आक्रमण करण्याआधी इराकला एकटे पाडले होते. आता सध्याच्या परिस्थितीत चीन भारतावर ह्याच मानसिक दबाव तंत्राचा प्रयोग करताना जराही कसूर सोडीत नाही आणि आपल्या कणखोर भूमिकेने भारतही चीनला पुरेपूर पुरुन उरला तर आहेच.

                                                                   

सिक्कीमच्या सीमेवरील ’डोकलाम’ येथे भारत व चीनचे जवान एकमेकांसमोर उभे ठाकले आहेत आणि तडजोडीची भाषा करायला चीन मुळीच तयार नसल्याचे दिसत असतानाच चीनची वर्तमानपत्रे , त्यांचे संबंधित अधिकारी  सतत भारताला वेगवेगळ्या प्रकारच्या धमक्या देऊन भारतीय नागरिकांचे  व शासनकर्त्यांचे मनोधैर्य खच्ची करण्याचे जबरदस्त प्रयत्न करीत आहे. जरी प्रत्यक्षात भारताविरूध्द चीनला युध्द पुकारणे ही दिसते तितकी सहज , सोपी बाब नाही हे चीनला पुरते ठाऊक असले तरी  चीन ह्या प्रकरणी भारतावर दडपण टाकण्याची एकही संधी न सोडता मानसिक दबावतंत्राचा वापर अधिकाधिक करीत असल्याचेच उघडकीस येत आहे असे म्हणणे चुकीचे ठरणार नाही. चीनच्या नेत्यांच्या मनातील जगातील सर्वात मोठी महासत्ता बनण्याचे मनसुबे तर उघडच आहेत सर्व जगासमोर. ह्या त्याच्या ध्येयाच्या पूर्तीसाठी चीनला आधी आशिया खंडात पूर्ण वर्चस्व स्थापन करणे अत्यावश्यक आहे व ह्याही उद्दिष्टाच्या आड जर कॊण येत असेल तर फक्त ’भारत’ . 

त्यामुळे भारताची चोहो बाजूंनी कोंडी करून भारताच्या नाकीनऊ आणण्याचे चीन पराकोटीचे प्रयत्न करीत आहे. भारताचा शत्रू तो चीनचा मित्र हे जणू चीनचे सहज सोपे समीकरण आहे. भारतची कट्टर शत्रूता निभावणारा पाकिस्तान हा तर चीनच्या गळ्यातील ताईतच आहे जणू आणि भारताच्या जवळच्या सर्वच राष्ट्रांशी चीनचे प्रेम अगदी भरभरून वाहात असते ते ह्याच करिता मग तो श्रीलंकेच्या हंबंटोटो बंदराचा विकास असो की पाकिस्तानचा सीपीईसी प्रकल्प . 

चीन हा देश स्वत:चा नकाशा कमीत कमी चार पट करण्याच्या विचारात आहे हे डॉ अनिरूध्द जोशींचे वक्तव्य ह्याची प्रचिती देते       

आग्नेय आशियातील छोट्या देशांसह आशिया प्रशांत क्षेत्रातील ऑस्ट्रेलियासारख्या देशांनाही चीन सातत्याने इशारे व धमक्या देत आहे. "ईस्ट चायना सी " क्षेत्रावरून जपान्शी सुरु असलेल्या वादात चीन जपानलाही अद्द्ल घडविण्याची भाषा बोलत आहे. ’साऊथ चायना सी’ क्षेत्रावरून चीन अमेरिकेलाही धमक्या देत आहेच. चीन हा देश स्वत:चा नकाशा कमीत कमी चार पट करण्याच्या विचारात आहे हे डॉ अनिरूध्द जोशींचे वक्तव्य ह्याचीच खूण पटविते. यावरून आणि पूर्वीच्या अनेक घटनांवरून चीन आपल्या साम्राज्यवादाच्या महत्वाकांक्षेचा झटका सर्व देशांना दाखवून देत आहे हे जाणवते.

चीनने अरूणाचल प्रदेशाच्या ६ जागांची बदलेली नावे , ’डोकलाम’ नंतर भारतच्या हद्दीत उत्तराखंड येथेल चमोलीच्या ’बाराहोटी’ येथील घुसखोरी ही सारी मानसिक दबाव टाकून थिथावण्याची युध्दतंत्रेच नाहीत का? 

अशा परिस्थितीत भारतीयांनी आपल्या सैन्यावर, जवानांच्या सामर्थ्यावर पूर्ण विश्वास ठेवणे अत्यंत आवश्यक आहे. दिवसागणिक अत्यंत प्रतिकूल परिस्थितींशी सामना करून आपले भारतीय जवान दहशतवाद्यांशीही कडवी झुंज देत आहेत , प्राणपणाने निकराने लढत आहेत. त्याच वेळी चीनचे नेते, वर्तमानपत्रे सतत युध्दाच्या धमक्या देत असूनही भारतीय लष्कर डोकलाम येथून तसूभरही मागे हटले नाही किंवा आपण माघार घेऊ असे चिन्ह ही दिसत नाही.त्यामुळेच चीनच्या ह्या मानसिक दबावतंत्र युध्दाला आम्ही भारतीय भीक घालीत नाही हेच चीनला सप्रमाण दाखविणे हे आम्हां नागरिकांच्याच हातात आहे.

१९६२ सालच्या युध्दाच्या पराभवाची चीन भारताला आठवण करून देतो. आम्ही भारतीय "हिंदी -चीनी भाई भाई " असे जरी गात असलो तरी आमच्या पाठीत सुरा भोसकणार्‍याचे हात देखिल वेळप्रसंगी उखडून टाकतो ह्याचे चीनने स्मरण ठेवणे तेवढेच आवश्यक आहे  मानसिक दबाव तंत्र ह्या युध्दतंत्राला आम्ही भारतीय मुळीच घाबरणार नाहीत , तुझ्यासारख्या नाठाळाच्या माथी सोटा हाणायला शिकविणारी रणनीतिचे धडे आम्हां  भारतीयांकडून आमच्या आर्य चाणक्यांनी आपल्या राज्यअर्थव्यवस्थेवरील ग्रंथातून कधीच गिरवून घेतले आहेत आणि ह्याच रणनीतिच्या आधारे संयुक्त राष्ट्रसंघ सुरक्षा परीषदेतही भारत चीनच्या डावपेचांना उलथवून आपले स्थायी सदस्यत्व १०८ % मिळविणारच आहे आणि त्याच बरोबरीने चमोलीतून जशी माघार चिनी सैन्याला घ्यावी लागली तशीच माघार डोकलाममधून घ्यावीच लागेल भारताच्या कणखर भूमिकेपुढे हाच विश्वास प्रत्येक भारतीयाच्या मनात आहे आणि असाच वाढत राहील ! 

संदर्भ : 

१. दैनिक प्रत्यक्ष 

२. तिसरे महायुद्ध पुस्तक - लेखक डॉ अनिरूध्द जोशी 

३.http://www.defencenews.in/article/China-claims-Doklam-Plateau-in-Bhutan-to-gain-strategic-edge-over-India-262876

सूचना : "चीनचे मानसिक दबावतंत्र आणि ...  " हा लेख प्रथम दैनिक प्रत्यक्षच्या दि, ०६ ऑगस्टच्या अंकातील "व्यासपीठ" सदरात प्रसिध्द  झाला आहे.